Midd Foddos vom Essen zum Fäisbugg-Brommi
Jürgen Wild bousded im Inderned kaane Berch odder bläide Gsichder – er gnibbsd einfach sein Deller ab
HERSCHBRUGG (sw/br) – Immer mehr Laid meggern rum, dass afm Fäisbugg blouß nu Gschmarri ummernander gebousded wird. Jeeder kochd sei eings Sübbler, un wenn’s nu su dünn is. A Jeder kümmerdsi blouß drum, woss bei ihm grood agduell afm Deller lichd. Genau ersuu gäihdz aa af dera Fäisbugg-Seidn vom Jürgen Wild zou. Der Herschbrugger is Landesgeschäfdsführer beim Bayerischn Landesverband der Margdkaafleud un Schausteller, dernehm hodder nu a Kinner-Karussell und an Süßwarenschdand. Un er bousded wirgli jeedz Gerichd. Woschd, obs a Schäufela is, a Nudel-Salood odder a Sahne-Doddn. Nix is vor seim Foddo-Abbarad sicher. Inzwischn is der Wild bekannd wäi a bunder Hund, drum hodder inzwischn scho an Haafn Fäisbugg-Kumbl. Un däi soong grood naus, woss denkn: „Leggere Woar“ die ann, die annern machnsi eher Sorng, wall der Wild is obdisch scho a schdaddlicher Broggn: „Wann willsdn du bei dem ganzn Fress-Zeuch abnehmer?!“. Obber der lachd beim Inderfjuh blouß un sachd: „Woss hobbdern? Ich woar doch äschd küzzli beim Frisöhr.“
HZ: Wäi hoddn däss alles oo gfangd?
Wild: Eichendli aus am Gschmarri raus. Ich hobb aafm Fäisbugg gsehng, dass alle blouß Berch, bläide Gsichder un Landschaffdn fodografiern denner. Hobbi mer denkd, Essn gnibbsn is schbannender und schaud massdns aa schenner aus. Un der Erfolg scheind mer rechd zu gehm.
Wie däss?
Des is aaner vom Jürgen Wild seine unzählichn Fäisbugg-Eindräge. Brodsubbn, Klöß mit Soß, aa Drümmer-Bradn, aa bissl aus der Schlachdschüssl - un einsam aa Dedderle Salood. An die Kommendare siechd mers: Die maasdn mögns genausuu un ned annerschd. „Die Leud gfällds“, maand der Wilds Jürgen un machd hald weider so.
Nerja, inzwischn hobbi af meiner Seidn 1500 Bilder blouß vom Essen. Un doumidd binni rechd bobulähr worn. Weecher meim Schauschdeller-Dschob kummi vill rum, un edz grichi mei Essn immer sofodd. Un ich grich aa jeedzmol an Blazz direggd neewerm Büffeh.
Weecher Ihre Essn-Foddos sinnz edz a echder Fäisbugg-Brommi?
Scho a weng. Közzli woari in Ulm bei anner Veranschdaldung. Der Moderador blauderd suu ummernander... un blözzli sachder ganz direggd zu
mir: „Herr Wild, is Büffeh is eröffned!“. Alle homms glachd. Odder dou die Sach midd dera Medro in Nürmberch...
Wäi wor däss?
Der Betriebsleider hoddmi bei am Einkauf erkannd un gsachd: Mensch, echd Glasse, dei FB-Seidn! Wall immer, wenni ned wass, wassi derhamm kochn soll, schaui bei dir draff un hull mer a boar Anrechunger. Nou hoddersi bei mir midder silbernen Medro-Kaddn bedangd.
Woss is däss?
Midd der moui nimmer durchn Haubdeingang, sondern kumm hindn nei. Däs gfraidmi gscheid, wal a ördlicher Gasdronom doumidd immer a weng oogehm hodd.
Wäih gängersn nochäd midd unabediddliche Kommendahre under Ihre Foddos um? Wenns widder amol üwer Ihr Gwichd herziehng?
Ach, wenni wass, morng gizz woss Gouds zum Essn, nou essi hald heud weenicher. Obber wenns dann heud aa woss Gouds gibd, nou waddi middm weenicher bis üwermorng. Gmüüs is eh ned su mei Ding.
Homms kanne Sorng um Ihre Gsundheid?
Des is der Wilds Jürgen, wäi er leibd und lebbd. Immer a fröhliches Lächln aff die Libbn, in die Händ massdns wos zum Essn. Wenn ihn aaner anfrozzld, obber ned aweng abnehmer will, dann konderd er immer goud: „Woss hobbdern? Ich woar doch äschd közzli beim Frisöhr.“
Däss scho. Dou doui aa woss derfier. Heid gizz zum Beischbill Obsd. Un wennz blouß zwaa Kirschn sinn.
Obsd sichi kanns aaf Ihrer Seidn
Walls langweili ausschaud! Is is eh suu a Sach midd anner Diäd. Dess mooch kanner. Un wenni abnehm, nou binni angeblich immer schlechd draff. Nou bleibi läiwer, wäihi bin, bousd is Essn, un die Leud gfällds...
0507LO110714.pdf